Frühner isches scho besser gsii

Jo das isch doch öppis wo mer immer wieder ghört, das händ mir scho vo eusne Eltere und Grosseltere ghört.

Wie chunnt mer dezue esone uusaag z mache? Isch es einfach s Alter, wo eus lot i de Vergangeheit a de schöne Erlebniss z zehre oder isches frühner würklich besser gsii?

Mer hed a weniger meistens me freud gha, es isch ehrlicher gsii, aber es hed au doo scho striit ghä, eifacht echli direkter…

Ich denke es isch eifach analoger gsii als die Digital Welt wo mer inepresst werdid, zumindest wird’s versuecht… me muess jo nid,.. sötti aber… es wäri besser Onlien Banking z mache seit d Bank, mer sötti d Stüüre am Computer uusfülle… mer sötti sich im Kundecenter aameld bi de Swisscom,.. mer sötti d Chips und sCoci jetzt bi Digitec oder Brack bstelle und no grad en Fernseh es Handy und den die Tintepatrone für de unersättlichi Drucker, wo immer wieder iitröchnet.

Für die Junge isch das alles es cools züüg und so eifach Online bstelle morn isches im Huus, denn alli die tolle Sache wo mer sich überall aameldet, S Facebook wos au so Tolli Wettbewerb git, det chammer sogar es Wohnmobil oder es Auto günne… oder sogar es iPhone wo angeblich falsch verpackt worde isch.

Mer cha au zu jedem Thema gliich wo mer isch grad isch siin Senf dezue ghä, mängisch halt nid so Nett, mer hed sich doch grad echli uufgregt und muess das schriib das der anderi en dummschwätzer isch, über eventuelli konsequenze macht mer sich erst spöter Gedanke, mer würd jo Aug in Aug gar nüd söttigs säge, aber im www isch das sehr eifach…

D Schüler dörfed s Handy i d Schuel mitnäh, dass chöned Musig lose währe dem schaffe, dass denn aber über Whattsapp au no de einti oder anderi echli Mobbed got den grad im gliiche zue.

Also d Ziit hed eus scho einigi tolli Sache brocht i de letzte Johrzähnt, es isch au schön do einiges z nütze, aber im grosse und ganze muess ich säge… frühner isches ebe scho besser gsii